جديد الموقع

Şengal Kurdistanê bike yek!

Hatin Şengalê, Şengal bihaye

Warê bav û kal, ronya çava ye

Dest davên namûs ew bê namûsan

Didin ber şûran komên ciwanan

Fermaneka din, ne war ne jî mal

Gelê me yî dilsoz hîştin bê mertal

Zarok û dayîk li nav wan çîya

Bê av û bê nan, koma sêwîya

Çavên min hene, destên min kinin

Qeydên min giran, hêstir dibarin

Sîng  nedan dijmin, bazdan bi şûn da

Navî wan reşbû heya di gorna da

Hatin Şengalê ew hovên çolan

Ji Şengalê bazdan pêşmergên Barzan

Pêşmergên revok, Xudê ne bi we ra

Bazdan û revîn nola dewara

H’eyfa wî navî, çima direvî?!

Kanî şêranî?! Rev karê rovî

Rev karê rovî…

Birînên neyara di laşê me da

Birînên biraka di dilê me da

Lalişa xemgîn ne bê xudan e

Ev xaka pîroz warê şêran e

Şêrên me hatin, çavan ramûsim

Bi hebûna şêran xudî namûs im

Hawar e Şengal, bazên me hatin

Ey netewa kurd, gîyanê welat in

Yekîneyên Gel, hêvîyên dila!!

We kirim ciwan, tevî van sala

Dîyarî we bin ciwanîya min

Çi dirêj çi kin, siberoja min…

Eger win hebin, emê her hebin

Cegerxûnên me wê ji gorna rabin

Cangorîyên me biha, bilindin

Pîrozîyên me namûsa kurd in

Şengala pîroz, koka Kurdistan!!

Sînor va neman, her der serhildan

Kurdistan yeke, her der serhildan

Her der serhildan…

 

Dr. Gundî Dilberz

 

05.08.2014

اضف رد

لن يتم نشر البريد الإلكتروني . الحقول المطلوبة مشار لها بـ *

*